Rəqəmsal İnkişaf və Nəqliyyat Nazirliyinə məxsus, ləğv olunmuş “Milli Nüvə Tədqiqatları Mərkəzi” QSC 2021-ci ili 1,698 milyon manat zərərlə başa vurub.
Press.az qurumun maliyyə hesabatına istinadən xəbər verir ki, bu, 2020-ci ilə nisbətən 9,4 % azdır.
Bununla belə, şirkətin yığılmış zərəri 15,5 % artaraq 12,647 milyon manata çatıb.
2021-ci ildə “Milli Nüvə Tədqiqatları Mərkəzi”nin əsas əməliyyat (satışdan) gəlirləri 24 min manat (2020-ci illə müqayisədə 2,1 % çox), digər əməliyyat gəlirləri 6 min manat (əvvəlki il olmayıb), məzənnə fərqindən gəlirləri 1 min manat (əvvəlki il zərər olub), maliyyə aktivlərinin dəyərsizləşməsi üzrə ehtiyat ayırmaları 3 min manat (2,1 dəfə çox), əməliyyat xərcləri 880 min manat (11,9% az), inzibati xərcləri isə 846 min manat (5,4 % az), təşkil edib.
Ötən il yanvarın 1-nə Mərkəzin aktivləri 6,198 milyon manat olub ki, bu da 1 il əvvələ nisbətən 2,3 % azdır. Hesabat dövründə qurumun öhdəlikləri 8 % artaraq 675 min manata çatıb, balans kapitalı isə 3,5 % azalaraq 5,523 milyon manata düşüb.
“Milli Nüvə Tədqiqatları Mərkəzi” 2014-cü ildə yaradılıb. Onun nizamnamə kapitalı 3 milyon manatdır. Prezident İlham Əliyevin "Azərbaycanda rəqəmsallaşma, innovasiya, yüksək texnologiyalar və rabitə sahəsində idarəetmənin təkmilləşdirilməsi ilə bağlı bəzi tədbirlər haqqında" 11 oktyabr 2021-ci il tarixli fərmanı ilə səhmdar cəmiyyətinin, eləcə də nazirlik yanında İnnovasiyalar Agentliyinin və Yüksək Texnologiyalar üzrə Tədqiqat Mərkəzinin birləşmə formasında yenidən təşkili yolu ilə İnnovasiya və Rəqəmsal İnkişaf Agentliyi yaradılıb.