Klublarımızın avrokuboklarda iştirakı ilə bağlı - UEFA-dan təsdiq

AFFA-nın Azərbaycanı avrokuboklarda təmsil edəcək klublarla bağlı UEFA-ya göndərdiyi qərarına ilk təsdiq cavabı gəlib.

Press.az AFFA-nın saytına istinadən xəbər verir ki, qitə futbol qurumu "Qarabağ"ın Azərbaycanı Çempionlar Liqasında, "Neftçi", "Keşlə" və "Sumqayıt"ın isə Avropa Liqasında təmsil etməsini təsdiqləyib.

Qeyd olunmuş klubların avrokuboklarda iştirakı ilə bağlı yekun təsdiq qərarı klubların müvafiq sifariş ərizələri UEFA-ya göndərildikdən sonra qəbul olunacaq.

Xatırladaq ki, AFFA İcraiyyə Komitəsinin iyunun 18-də keçirilmiş iclasında Azərbaycan Premyer Liqasının dayandırılması barədə qərar qəbul olunub. COVID-19 qlobal pandemiyası ilə əlaqədar 2019/2020-ci il mövsümü üçün Azərbaycan Premyer Liqası və ölkə kuboku uğrunda yarış dayandırılıb. Mövsümün qalibi və UEFA-nın klub yarışlarında iştirak edəcək komandalar hazırkı turnir cədvəlinə uyğun olaraq müəyyənləşdirilib.