"Yuventus"da rəhbərliklə futbolçular arasında görüş

"Yuventus"un yeni rəhbərliyi klubun A seriyasında 15 xalının silinməsindən sonra futbolçularla görüşüb.

Press.az İtaliya mətbuatına istinadən xəbər verir ki, Turin təmsilçisinin yeni prezidenti  Canluka Ferrero və baş direktor Andrea Skanavino komandanın futbolçuları qarşısında 10-15 dəqiqə davam edən çıxış edib.

Klubun yeni rəhbərləri verilən cəzanı ədalətsiz adlandırıb və bildiriblər ki, bu haqsızlıqdan sonra birləşmək və daha da yaxşı işləmək lazımdır. “Yuventus” qanuni olaraq öz maraqlarını qorumağa çalışacaq və komanda meydanda xal qazanmalıdır.

Futbolçulara həmçinin söyləyiblər ki, bu çətin anda onlar bütün dünyada milyonlarla “Yuventus” azarkeşini təmsil edirlər. Bu baxımdan futbolçular meydanda maksimumunu göstərəcəklərini vurğulayıblar.

Qeyd edək ki, 15 xalın silinməsindən sonra Turin təmsilçisi hazırda 22 xalla 10-cu pillədə qərarlaşıb.