Premyer Liqamızda son mövsümün gümüş mükafatçısı “Qarabağ” iyunun 14-də hazırlığa başlayacaq.
Press.az xəbər verir ki, bu barədə Qol.az-a klubunun mətbuat xidmətinin rəhbəri Gündüz Abbaszadə məlumat verib.
O bildirib ki, pandemiyanın yaratdığı problemlər səbəbindən hələlik təlim-məşq toplanışının 2-ci mərhələsinin hansı ölkədə olacağı dəqiqləşməyib: “Bakıda yığışırıq, amma 2-ci mərhələnin harada olacağı hələlik dəqiqləşməyib. Püşkü gözləyirik. Həm də pandemiyanın da təsiri var. Bu vəziyyətdə komandalar harada olacaq, necə olacaq, hələlik bilinmir. Yoxlama oyunları keçirilməlidir. Bütün bunları nəzərə alaraq qərar veriləcək. Düzdür, variantlar var, amma yekun qərar verilməyib”.
Qeyd edək ki, “Qarabağ” bu mövsüm ölkəmizi yeni yaradılan Konfrans Liqasında təmsil edəcək. Ağdam klubu mübarizəyə 2-ci təsnifat mərhələsindən başlayacaq. Bu mərhələnin püşkü iyulun 12-də atılacaq. İlk oyunlar iyulun 22-də, cavab matçları 29-da keçiriləcək.