logo
First slide

ÜST Azərbaycana dəstək göstərəcək

06 Apr 2021 rating_stars rating_stars rating_stars rating_stars rating_stars

Ümumdünya Səhiyyə Təşkilatı (ÜST) və Əmək və Əhalinin Sosial Müdafiəsi Nazirliyinin birgə təşkilatçılığı ilə Azərbaycanda köməkçi texnologiyalar (KT) sektorunun (təkərli oturacaqlar, eşitmə cihazları, protezlər, eynəklər və s.) gücləndirilməsi ilə bağlı maraqlı tərəflərin rəhbər işçiləri üçün onlayn toplantı keçirilib.

Press.az xəbər verir ki, görüşdə nazirliklərin, dövlət komitələrinin rəhbər işçiləri, parlament komitələrinin sədrləri, universitet və akademiyaların rektor-professor heyəti, beynəlxalq təşkilatların, səfirliklərin və QHT-lərin nümayəndələri olmaqla ümumilikdə 45 qurum təmsil olunub.

Toplantını giriş sözü ilə ÜST-nin Azərbaycandakı nümayəndəsi Hande Harmancı və Əmək və Sosial Müdafiə nazirinin müavini Anar Kərimov açdıqdan sonra bildirilib ki, ÜST və nazirlik Azərbaycanda KT sektorunun gücləndirilməsi üzərində birgə çalışmağa başlayır.

ÜST-nin hesablamalarına əsasən, bu gün dünyada 1 milyard insanın məhsuldar, inklüziv və ləyaqətli həyat yaşaması üçün KT-yə ehtiyacı var, ancaq qlobal olaraq hər 10 nəfərdən yalnız 1-nin ehtiyac duyduğu KT-dən istifadə etmək imkanı var. KT-yə əlçatanlıq bir çox insanın öz funksionallığını, sağlamlığını və rifahını qorumaq və yaxşılaşdırmaq, təhsil, iş və sosial fəaliyyətlərdə iştirak etməsi üçün zəruridir. Adətən KT-yə ehtiyacı olan insanlar yaşlılar, əlilliyi olan şəxslər, münaqişələr nəticəsində yaralananlar və xroniki xəstəliklərdən əziyyət çəkənlərdir.

İlk mərhələdə ÜST-nin r-ATA (“Rapid-Assistive Technologies Assessment”, “Sürətli Köməkçi Texnologiyaların Qiymətləndirilməsi”) metodologiyasından istifadə edərək yerli KT ehtiyaclarının müəyyənləşdirilməsi nəzərdə tutulur. Bu qiymətləndirmənin nəticələri Azərbaycanda KT sahəsində ödənilməyən ehtiyaclar və bu yolda olan əngəlləri müəyyənləşdirməyə kömək edəcək. Araşdırmanın əsas elementlərindən biri ÜST-nin “Qlobal KT İstifadə Proqramı” (GATE Təşəbbüsü) çərçivəsində ölkə üçün prioritet köməkçi vasitələrin siyahısının hazırlanmasında Azərbaycana texniki dəstək vermək, nazirliyin gələcək siyasətinin sübuta yetirilmiş ehtiyaclar və prioritetlər üzərində qurulmasına dəstək göstərməkdir. Araşdırmanın nəticələri üzərində qurulan siyasət ilə uzunmüddətli perspektivdə ölkənin ÜST-nin Universal Tibbi Təminat proqramının hədəflərinə çatmasına və BMT-nin Əlilliyi olan Şəxslər üçün Hüquqlar Konvensiyasının öhdəliklərini yerinə yetirməsinə nail olmağa yardım göstərəcək.

Toplantıda çıxış edən Milli Məclisin Səhiyyə komitəsinin sədri akademik Əhliman Əmiraslanov, İnsan hüquqları komitəsinin sədri Zahid Oruc, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, Azərbaycan Dövlət Bədən Tərbiyəsi və İdman Akademiyasının rektoru Fuad Hacıyev, Əmək və Əhalinin Sosial Müdafiəsi Nazirliyinin Əlillik siyasəti şöbəsinin müdiri Sabir Qocayev, Əlil Təşkilatlar İttifaqının prezidenti Davud Rəhimli, Səhiyyə Nazirliyinin Analitik Ekspertiza Mərkəzinin şöbə müdiri Esmira Əkbərova tədbirin təşkilatçılarına minnətdarlığını bildiriblər və görüləcək işlərin əhəmiyyətini və zəruriliyini qeyd edərək onlara hərtərəfli dəstək veriblər.

Çıxışlarda ötən il Dağlıq Qarabağ və onun ətrafında baş verən müharibədən sonra bir çox yaralı insanda əlilliyin inkişaf etməsinin Azərbaycanda KT ehtiyaclarının daha da artmasına gətirib çıxardığı xüsusilə vurğulanıb və məsələnin ölkə üçün çox aktual olduğu qeyd olunub.

Oxşar xəbərlər
OTACI
OTACI