Avro-2020-yə ev sahibliyi Bakıdan alına bilər

Bakı Avro-2020-yə ev sahibliyi edəcək şəhərlərdən biri olmaya bilər.

Press.az xəbər verir ki, bu barədə Almaniyanın “Sportschau” nəşri yazıb. Bildirilib ki, koronavirus pandemiyasının kəskin yayılması səbəbindən turnirə ev sahibliyi edəcək şəhərlərin sayı 12-dən 7-yə düşə bilər. Proqramdan çıxarılan 5 şəhərin Bakı, Bilbao, Dublin, Qlazqo və Münhen olduğunu vurğulanıb.

Nəşr yazıb ki, UEFA yekun qərarını azarkeşlərlə bağlı təşkilatçılardan təminat aldıqdan sonra aprelin əvvəllərində verəcək.

Qeyd edək ki, 11 iyun – 11 iyul tarixlərində keçiriləcək Avro-2020-nin qrup mərhələsinin 3, 1/4 finalın isə bir oyunu Bakı Olimpiya Stadionunda keçirilməlidir.