Azərbaycan Silahlı qüvvələri döyüş məkanında Azərbaycanın işğal olunmuş ərazilərində sülhə məcburetmə əməliyyatları çərçivəsində yalnız legitim hərbi obyektləri sıradan çıxarmaqdadır.
Press.az xəbər verir ki, bunu Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Gəncədə keçirilən brifinqdə bildirib.
“Humanitar atəşkəs imzalansa da, Ermənistan öz riyakarlığını bir daha göstərdi və Gəncə şəhərində terror aktı həyata keçirdi. Biz bunu qəti şəkildə pisləyirik. Vasitəçilik missiyasını həyata keçirən tərəf – ATƏT-in Minsk Qrupu buna qiymət verilməlidir”, - H.Hacıyev bildirib.
O qeyd edib ki, düşmənin məqsədi mülki əhalini hədəf alaraq, əhali arasında təşviş və panika yaratmaq olsa da, ancaq buna nail ola bilməyəcək.