Erməni deputatlar Qarabag üzrə qapalı dinləmələr keçirilməsini tələb ediblər

“Qarabağ problemi üzrə son hadisələr, xüsusən Paşinyan-Əliyev görüşü barədə bəzi məqamlara aydınlıq gətirilməlidir”.

Ermənistan KİV-lərinin yazdığına görə, bunu “Çiçəklənən Ermənistan” partiyasının nümayəndəsi, deputat Arman Abovyan deyib.

Onun sözlərinə görə, məhz bu səbəblə parlamentdə təmsil olunan partiya nümayəndələri bütün siyasi qüvvələrin iştirakı ilə qapalı dinləmələrin keçirilməsini tələb edir.

Deputat əlavə edib ki, bu dinləmələrə baş nazir Nikol Paşinyan, Ermənistanın müdafiə və xarici işlər nazirləri, həmçinin separatçı Qarabağ rejiminin rəhbərliyi də dəvət edilməlidir.

 “Biz bu məsələ ilə əlaqədar parlamentin spikerinə müraciət etmişik”,- deyə o bildirib.

Oxu.az