First slide

İslamiada: Azərbaycanın qadın həndbol millisi titulunu qoruya bilməyib

14 Aug 2022 rating_stars rating_stars rating_stars rating_stars rating_stars

Qadın həndbolçulardan ibarət Azərbaycan milli komandası Türkiyənin Konya şəhərində keçirilən V İslam Həmrəyliyi Oyunlarında final görüşünə çıxıb.

Press.az xəbər verir ki, rəqib Türkiyə yığması olub. Görüş yerli komandanın qələbəsi ilə yekunlaşıb.

Oyuna Azərbaycan millisi fəal başlayaraq, qarşılaşmanın əvvəllərində hətta 3 top fərqi ilə önə çıxsa da, tədricən üstünlüyünü əldən verib. Nəticədə "ay-ulduzlular" hesabda önə çıxmağı bacarıblar. Beləliklə, birinci hissə meydan sahiblərinin üstünlüyü ilə tamamlanıb - 14:10.

Fasilədən sonra da fəal təsir bağışlayan Türkiyə millisi fərqi daha da artırmağa başlayıb. Yalnız sonlara doğru qonaq komanda fərqi azaltmağa müvəffəq olub. Bununla belə, "ay-ulduzlular" 30:24 hesabı ilə qalib gələrək, İslamiadanın qalibi olub.

Beləliklə, Azərbaycan millisi 2017-ci ildə Bakıda keçirilmiş İslamiadanın qalibi titulunu qoruya bilməyib və gümüş medalla kifayətlənməli olub. Həmin vaxt finalda 26:28 hesabı ilə yenilmiş Türkiyə yığması bu dəfə məğlubiyyətin əvəzini çıxmağı bacarıb.

Kamerun millisi isə Bakı-2017-də olduğu kimi, yenə 3-cü yer uğrunda görüşdə Özbəkistana qalib gələrək, bürünc medala yiyələnib. 5 il öncəkindən fərqli olaraq, bu dəfə 35:27 yox, 40:27 hesabı qeydə alınıb.

Oxşar xəbərlər
OTACI