2015-ci il dekabrın 4-də "Neft Daşları” NQÇİ-nin 501 nömrəli özülündə baş vermiş qəza nəticəsində itkin düşən neftçilərdən birinin meyitinin tibbi ekspertizasından sonra şəxsiyyəti müəyyənləşib. Meyit ölən neftçilərdən birinə - 1961-ci il təvəllüdlü Bəhmən Cəfərova məxsusdur.
Press.az Modern.az-a istinadən xəbər verir ki, bu barədə neftçinin oğlu Bəhruz Cəfərov məlumat verib.
Qeyd edək ki, bir neçə gün əvvəl SOCAR dənizdə insan qalıqlarının tapıldığını, onun Neft Şirkətinin dekabrın 1-də itkin düşmüş əməkdaşına məxsus olmadığını açıqlamışdı.
Xatırladaq ki, 4 dekabr 2015-ci ildə "Neft Daşları” NQÇİ-nin 501 nömrəli özülündə güclü tufan nəticəsində dalğalar estakada döşəməsini üstündəki yaşayış köşkü ilə birlikdə dənizə atıb. Hadisə baş verərkən buxar aqreqatının maşinisti 1971-ci il təvəllüdlü Cavad Xudaverdiyev, səyyar aqreqatın motorçuları - 1961-ci il təvəllüdlü Bəhmən Cəfərov və 1974-cü il təvəllüdlü Rövşən Məmmədov köşkdə olublar. Qəza ilə bağlı Cinayət Məcəlləsinin 314-cü (səhlənkarlıq) maddəsi ilə cinayət işi başlanıb.
Qeyd edək ki, "Günəşli" yatağında baş verən faciə də eyni vaxta təsadüf edir.