Çin COVAX proqramına 100 milyon dollar ianə edəcək

Çin Xalq Respublikası (ÇXR) COVAX proqramı çərçivəsində vaksinasiya prosesi üçün 100 milyon ABŞ dolları ianə edəcək.

 Bunu ÇXR Sədri Si Cinpin BMT Baş Assambleyasının 76-cı sessiyasında onlayn formatda çıxışı zamanı deyib. Si Cinpin COVAX-a maliyyə yardımından əlavə olaraq Çinin inkişaf etməkdə olan ölkələrə 100 milyon doza COVID-19 peyvəndi ianə edəcəyini də bildirib.

Dünyada COVID-19 virusuna qarşı əsas peyvənd istehsalçılarından olan Çinin lideri bəyan edib ki, Çin şirkətləri cari il ərzində müxtəlif ölkələrə 2 milyard doza COVID-19 peyvəndi təqdim edəcək.

Qeyd edək ki, Çin indiyədək təxminən 106 ölkə və 4 beynəlxalq təşkilata 1 milyard dozadan çox COVID-19 peyvəndi təqdim edib. Bunların əsas hissəsi kommersiya prinsipi əsasında satılıb, müəyyən hissəsi isə ianə kimi verilib.

Çin şirkətləri 2 milyard doza peyvənd öhdəliyini yerinə yetirməkdə qərarlıdır. Belə ki, Çin şirkətləri dünyada COVID-19 vaksinlərinə artan tələbatı ödəmək üçün illik istehsal gücünü 5 milyard dozaya çatdırıb.

Bundan başqa, Çin şirkətləri bəzi ölkələrdə tam və ya qismən vaksin istehsalına da başlayıb.

azərtac